የዛሬዋ ኢትዮጵያና የነገ ውሎዋ – አንዱ ዓለም ተፈራ

1

ረቡዕ፣ ግንቦት ፬ ቀን፣ ፳ ፻ ፲ ፫ ዓ. ም.
ነፃ አስተያየት፤ በአንዱ ዓለም ተፈራ

በጠባብ የዛሬ ጥቅምና ስኬት የተሸፈነ ዓይን፤ ነገ የሚጠብቀውን ገደል መመልከት ይራባል።

አንድ አገር እንድትመሠረትና አገር ሆና እንድትቀጥል፤ ብዙ የታሪክ ሁኔታዎች መገጣጠምና መሳካት አለባቸው። ይህ ደግሞ ብዙ ዘመን የሚወስድ ክስተት ነው። በአንፃሩ አንድን አገር ለማፈራረስ፤ አውቀው ሆን ብለው የተነሱት፤ በጉልበትና በተንኮል! ወይንም ሳያውቁት በተለያየ ጠባብና ጥቃቅን የጥቅም ስሌት ተመርኩዘው ለተነሱት፤ በድንቁርና ሊከናወን ይችላል። ለዛሬዋ ኢትዮጵያ ችን፤ የኒህ ሁለቱ መንገዶች መንትያ ሀቅ ከፊታችን ተደቅኗል። ልትቀጥል ነው ወይንስ ልትፈርስ! ዝም ብሎ “ኢትዮጵያ አትፈርስም!” ማለት፤ መደረግ ያለበትን ዝግጅት ዘንግቶ፤ ለማያውቁት ኃይል ኃላፊነትን መዳረግ ነው። ውጤቱ ሲያምር፤ “አላልኳችሁም!” ለማለት። ውጤቱ ሳያምር ደግሞ አንገትን ለመድፋትና ለመደበቅ ነው። ውጤቱ ምንም ሆነ ምንም፤ የራሳችንን ኃላፊነት ሳንወጣ ለሌሎች አሳልፈን በሠጠነው ጉዳይ፤ የዉጤቱ ባለቤትና ወሳኝ ልንሆን አንችልም። የአገራችን የነገ ውሎዋ አስተማማኝ አይደለም። ማየት ተስኖን፤ ከተጨባጩ እውነታ ርቀን፤ በራሳችን የግል ጥቅም ላይ ባተኮርን ቁጥር፤ ትልቁ ዕይታ ካይናችን ይሰወራል። እንኳንስ የነገውን ሀቅ ይቅርና፤ ዛሬ እግራችን የሚረግጥበትን መሬት ማየት ይሳነናል። የአገር ሕልውና የሚጠበቀው፤ ትክክለኛ ሕገ-መንግሥት ኖሮ፣ ሕዝቡ አመኔታውን በሕግና ስነ ሥርዓት ላይ አሳድሮ፣ በሥልጣን ላይ የሚቀመጡት ኃላፊዎች፤ እንደሌላው ግለሰብ ለሕጉና ስነ ሥርዓቱ ተገዝተው ሲገኙ ነው። ይህን መሠረት አድርጎ ነው፤ በዛሬዋ ኢትዮጵያ ያለውን ሀቅ ይህ ጽሑፍ የሚፈትሸው።

images
images

ታሪክ፤ ሰዎች ፈልገው በተለሙት መንገድ የሚወርድ ፈሰስ ሳይሆን፤ ከሰዎች ፍላጎትና ስሌት ውጪ፤ በቦታው ላይ ባለው ሀቅ የሚነዳ ጎርፍ ነው። አገር፤ ሆን ብለው ሊያፈርሷት በተነሱ ወይንም ሳያውቁት፤ ዓይኖቻቸው የአገር ዜግነት ምንነትንና የአገር ትልቅነት ላይ ማተኮር ያለበትን በዘነጉት ልትፈራርስ ትችላለች። በመጀመሪያው መንገድ፤ ምስሌ ቢጠቀስ፤ ከውጪ የመጣ ጠላት የሚያካሂደው ወረራ ነው። ይህ በታሪካችን በተደጋጋሚ ተከስቷል። የጣሊያን መንግሥት፤ የቱርክና የግብፅ መንግሥታት፤ የድርቡሽ ወራሪዎች፣ የሶማሊያ ተስፋፊዎች የሚጠቀሱ ናቸው። በሁለተኛው መንገድ ደግሞ፤ የእንግሊዝ ወራሪ ኃይል በናፒየር እየተመራ በመጣ ጊዜ መንገድ በመሩትና፤ በጣሊያን ወረራ ጊዜ ባንዳ ሆነው ባገለገሉት ተተግብሯል። በሁለቱም መንገድ የተቃጣብንን ጥቃት፤ ውድ አገር ወዳድ ኢትዮጵያዊያን ተከላክለውና አክሽፈው፤ አገራችንን ለኛ እንድትቆይ አድርገውልናል።
አገርን አገር ሆና እንድትቀጥል፤ ሰላም በአገር እንዲኖርና ሕዝቡ ለልማት እንዲሰማራ፤ መሠረቱ ትክክለኛ ሕገ-መንግሥት ነው። ይህ፤ የአገራችን ዋናው ገዥ ሰነድ ነው።

የባለሥልጣናትም ተግባርና ኃላፊነት የተወሰነው በዚሁ ሰነድ ነው። ይህ ሰነድ፤ ያለ አማራጭና ያለ ማወላወል ሕዝቡ የኔ ብሎ የተቀበለውና ያመነበት መሆን አለበት። የዚህ ሰነድ ምንጭና አዘገጃጀት፤ ለተቀባይነቱም ሆነ ለተግባራዊነቱ ወሳኝ ነው። የሕገ-መንግሥት መኖር ብቻውን በራሱ በቂ አይደለም። ሕገ-መንግሥቱ ትክክለኛ ሲሆን ነው ገዢ የሚሆነው። ባሁኑ ሰዓት ባገራችን ላይ ያለው ሕገ-መንግሥት፤ ምንጩም ሆነ አዘገጃጀቱ ኢትዮጵያዊነትን ያቀፈ አይደለም። እናም አብዛኛው ኢትዮጵያዊ፤ አትከፋፍሉን! በያለንበት ሁላችንም እኩል ኢትዮጵያዊያን ነን! ዘርና ሃይማኖትን መሠረት አድርጎ የተነሳ ሂደት ያፋጀናል! ታሪካችን ይሄን አይፈቅድም! በማለት ሰላማዊ ሰልፍ አድርጓል። ለዚህም ከፍተኛ መስዋዕት ከፍሏል። አሁን በአገራችን ለተከሰቱት ብዙዎቹ ችግሮቻችን መንስዔው ይሄው ሕገ-መንግሥት ነው። መነሻው ይሄ ሆኖ፤ ከዚህ መንጭተው አገራችንን በማተራመስ ላይ ያሉ ብዙ ጉዳዮች አሉ።

ኢትዮጵያዊያን ኢትዮጵያዊያንን ሲገድሉ፣ በትክክል መግለጥ በማይቻል አረመኔነት ሲጨፈጨፉ፣ ቤት ንብረት፣ ሰፈር መንደር ትርጉም አጥተው ሕይወትን ለማትረፍ ሩጫ ሲያቸንፋቸው፣ መኖር ማለት በፍርሃትና በድንጋጤ ተከቦ መደንበር ሲሆን፣ እኛ ማነን? አገራችንስ ምንድን ነች? ይሄ በአንድ ምሽት የተከሰተ ጉዳይ አይደለም። ብዙ የታሰበበትና በዕቅድ የተተገበረ እውነታ ነው። እናም በደንብ መመርመርና መጠናት አለበት። ኢትዮጵያ ለኛ የደረሰችን፤ አገር ወዳድ ኢትዮጵያዊያን በየዘመናቸው በከፈሉት ሕይወት ነው። የኛ ዘመን ኃላፊነት፤ ኢትዮጵያን ለነገ ኢትዮጵያዊያን ከተቀበልንበት አሳምረን ማሳደር ነው። በአገር መኖር ማለት ለግል፤ ዛሬ ብቻ ሆድን ሞልቶ ወደ መኝታ መሄድ ማለት አይደለም። በአገር ላይ ካሉ ሰዎች ጋር የጋራ ኃላፊነት አለብን። “አባት የሞተ ዕለት ባገር ይለቀሳል። እናት የሞተች ዕለት ባገር ይለቀሳል። አገር የሞተ ዕለት ወዴት ይደረሳል!” የተባለው የአገርን ቦታ በግልጥ ለማሳየት ነው።

ተጨማሪ ያንብቡ:  ‹‹ትንሹ›› ተስፋዓለም (ከጽዮን ግርማ)

እንግዲህ አሁን ላለንበት ሀቅ ተጠያቂው ማነው? መነሻው ይሄን ተጠያቂ ለይቶ ማወቁ ነው! አማራ ነህ፣ ወላይታ ነህ፣ ዶርዜ ነህ፣ አኙዋክ ነህ፣ ተብሎ አንድ ኢትዮጵያዊ ከታረደ፤ አገራችን ወደ የት እየሄደች እንደሆነ መገመቱ ከባድ አይደለም። ይህ የልብ ወለድ ትረካ አይደለም። እውነት፣ ታሪክ፣ ምንነትና አገር ትርጉማቸው ጥያቄ ውስጥ ገብቷል። በፈጠራ የተመላ ታሪክ በሥልጣን ጥመኞች ተለፎ፣ ኢትዮጵያንና ኢትዮጵያዊነትን በጠሉ ባለሥልጣናት ሕገ-መንግሥቱ ረቆና ጸድቆ፣ ይሄን ያልተቀበለ ጠላት ተብሎ ተፈርጆ፤ ነገ ኢትዮጵያ ትኖራለች ብሎ መመኘት አጉል ነው! ይህ ያለንበት የፖለቲካ ሀቅ ነው። ይሄን ያለንበትን የፖለቲካ ሀቅ በግልጥና በትክክል መናገር ካልቻልን፤ እየኖርን አይደለም! ይሄን መናገር ታሪካዊ፣ ኢትዮጵያዊና ትውልዳዊ ግዴታ አለብን። ባንዳ ሰባራ ጠርሙስ በከሰከሰበት መንገድ ባዶ እግራቸውን ተጉዘው ፋሽስቱን እንደተጋፈጡት ቀደምቶቻችን ባንበረታም፤ በያለንበት በአገራችን በተጨባጭ ያለውን ሀቅ በትክክል መናገሩ፤ በጣም ቀላሉ ኃላፊነት ነው። በርግጥ መናገሩ ብቻ በቂ አይደለም! በደልን መዘርዘሩ በዳዩን ከመበደል አያቆመውም። ተበዳይ በቃኝ ብሎ መነሳት አለበት። ያ ብቻ ነው መፍትሔ የሚያመጣው። አትበድሉኝ ብሎ መነሳት ወንጀል ሳይሆን፤ የተፈጥሮ ግዴታ ነው።

አገራችን በተፈጥሮ የታደለች ነች። ብዙ የተጠራቀመ ንብረት አላት። ከነኚህ ዋናውና አውታሩ ሕዝቧ ነው። የኢትዮጵያ ሕዝብ አንድ ነው። ፍላጎቱ በሰላም ውሎ መግባቱ፣ እርሻው መሳካቱ፣ ገበያው መድራቱና አብሮ መኖሩ ነው። ታዲያ ይኼ በምኞትና ቁጭ ብሎ በማየት የሚሳካ ሳይሆን፤ ሁልጊዜም ነቅተው የሚጠብቁትና የሚቆሙለት መሆን አለበት። ለዚህ ደግሞ በሥልጣን ላይ ያሉት ብቻ ሳይሆኑ፤ እያንዳንዳችን የግዴታ መቆም አለብን። ጥቃቅን ልዩነቶች ወሰን አላቸው። የኢትዮጵያዊያን አደጋ ላይ መውደቅና የአገር ሕልውና ከፊታችን ሲገረጥ፤ አንድነት መነሳት አማራጭ የለውም። ምርጫው ሆነ የየቡድን ፖለቲካው፣ የአባይ ግድብ ሆነ የግብጥ መንደፋደፍ፣ የዚህ ጉዳይ ንዑስ አካላት ተደርገው መወሰድ አለባቸው። ኢትዮጵያዊያን እያለቁ ነው! መጀመሪያ ኢትዮጵያዊያን ሆነን፣ በሕገ-መንግሥቱ ተከብረን ስንገኝ ነው ምርጫ ትርጉም የሚሠጠው። ምርጫን ማድረግ የያዙትን ሥልጣን ሕጋዊ ለማድረግ ከሆነ፤ እስከዛሬ በታሪካችን ብዙ ምርጫዎች ተደርገዋል። ትክክለኛ ግን አንዳቸውም አልነበሩም።

በሥልጣን ላይ ያለ አካል፤ በሥልጣኑ ላይ ለመቆየት፤ የሚቀምመው ተንኮል፤ አገርን ሊያፈርስ ይችላል። “ሥልጣን ያባልጋል። ፍጹም ሥልጣን ደግሞ፤ ፍጹም ጠቅልሎ ያባልጋል!” ይባላል። ሹሞች በሥልጣን ላይ የተቀመጡት፤ አገራቸውን ለማገልገል እንጂ፤ ራሳቸውን ለማበልጠግና የግል ዓላማቸውን ለማራመድ አይደለም። ያ ሲሆን አገር አደጋ ላይ ትወድቃለች። ሥልጣንን እና ጉልበትን የተማመነ ክፍል፤ ከሕዝብ ኃላፊነት ይወጣል። ባለሥልጣናት እውነትን ክደው፣ በራሳቸው እብሪት ተመርኩዘው፣ ጉልበታቸውን ተማምነው፣ በሥልጣን ላይ ለመቆየት፤ ሕዝቡን ሰርዘው፣ ራሳቸውን የአገራችን የኢትዮጵያ ብቸኛ ወካይ አድርገው ያቀረቡ ጊዜ፤ የአገራችን የወደፊት ዕጣ አደጋ ላይ ይወድቃል። በሥልጣን ላይ ያለ አካል፤ ከራሱ ድርጊት ሌላ፤ ሌሎችን አሰባስቦ፣ ከመንግሥት ውጪ ያሉ ሕገ-ወጥ አካላት የሚያካሂዱት ድርጊት በማስመሰል ሕዝባዊ በደልን ሲፈጸም፤ የአገር ሕልውና አደጋ ላይ ይወድቃል።

አሁን በአገራችን በኢትዮጵያ እየተካሄደ ያለው አማራውን በያለበት መጨፍጨፍ ወዴት ይወስደናል? መላ ኢትዮጵያዊያን ምን ማድረግ ይገባናል? የሰብዓዊ መብት ጠባቂዎች በየጊዜው ዋጋ እየከፈሉ ይሄንን ዘግበዋል። የአማራ ወጣቶች ባደባባይ ይህ እንዲታወቅ ጮኸዋል። አሁንም ከፍተኛ ዋጋ በመክፈል ላይ ናቸው? ይሄንን በአማራው ላይ እያደረሰ ያለው ክፍል፤ ሌሎች ይከተላሉ እያለ ነው። ይህ ክፍል ፀረ-ኢትዮጵያዊያን እና ፀረ-ኢትዮጵያ ነው። በዚህ ክፍል የሚጠቃለሉት የትግሬዎች ነፃ አውጪ ግንባርና ኦነግ ሸኔ ብቻ አይደሉም። ከግለሰብ እስከተደራጀ አካል ድረስ አቅደው የተንቀሳቀሱበት የፖለቲካ ስሌት ነው። ይሄንን መረዳት አለብን።
ኢትዮጵያ በልጆቿ አንድነቷ ተጠብቆ፣ ዛሬም ወደፊትም ትከበራለች።

ተጨማሪ ያንብቡ:  በብዕር ስም የሚንቀሳቀሱ አክቲቪስቶቹን ማን ነዉ እያሲያዛቸዉ ያለዉ? - ሸንቁጥ አየለ

የዛሬዋ ኢትዮጵያና የነገ ውሎዋ (ክፍል )

ረቡዕ፣ ግንቦት ፳ ቀን፣ ፳ ፫ ዓ. ም.
ነፃ አስተያየት፤ በአንዱ ዓለም ተፈራ

ያለንበትን ሀቅ አለመረዳት፤ ሊከተል የሚችለውን ክስተት አያስቀረውም።

ዛሬ በአገራችን ያለው የተመሰቃቀለ የፖለቲካ ሂደት፤ ለአገር ወዳድ ኢትዮጵያዊያን በጣም አሳሳስቢ ነው። በርግጥ እስከዛሬ በተደጋጋሚ፤ “አገራችን አደጋ ላይ ነች!” “ይህን አጋጣሚ ሳንጠቀምበት ካሳለፍነው፤ የሚከተለው አስፈሪ ነው!” የመሳሰሉት ሲነገሩ ነበር። ብዙ ጥሩ አጋጣሚዎች፤ መጥተው አልፈዋል። ሳንጠቀምባቸው አምልጠውናል። በትክክል ለማቅረብ፤ ዕድሉን አባክነነዋል። የዛሬው ከስካሁኖቹ በጣም የተለየ ነው። ከውጪ እየተደረገ ያለው ተፅዕኖ፣ በአገር ውስጥ ያለው የፅንፈኞች አላባራ ያለ አረመኔያዊ ድርጊት፣ የኮቢድ ተስቦ በሽታ፣ ለሃያ ሰባት ዓመታት በትግሬዎች ነፃ አውጪ ግንባር የተተበተበውና የተቀበረው የዘር አገዛዝ ረመጥ፣ ቁርጡ ያለታወቀ የትናንቱ ኢሕአዴግ፤ የዛሬው ብልፅግና ፓርቲ አገዛዝ ተደማምሮ፤ አደጋውን ከመቼውም በላይ በተለየ አግዝፎታል። እንደምንረዳው የትግሬዎቹ ነፃ አውጪ ግንባር ከቦታው መልቀቁ ብቻውን በቂ አይደለም። ይልቁንም በትግሬዎቹ ፋንታ ሌላ ተተክቶ ያንኑ ስርዓት ከነመዘዙ አያካሄደ ነው። የጠገበው ጅብ ሄዶ፤ የተራበው ጅብ ተተክቷል ማለት ይቻላል። ግድያውና ማሳደዱ፣ ንብረት ማውደሙና የሃይማኖት ተቋማት ላይ ያላባራ ዘመቻው፣ ሕግ አክባሪዎች መታሰራቸውና ሕገ ወጦች እንደልባቸው መቧረቃቸው፤ እንደቀጠለ ነው። እስከመቼ!!! ጉዳዩ የሚመለከተን ምን እያደረግን ነው? ኃላፊነታችንን እየተወጣን ነው ወይ? የአደጋውን ክብደት ተረድተናል ወይ? ይሄ አዝማሚያስ ወደ ሌላ ተተኪ አምባገነን እየወሰደን ነው ወይ? እስኪ በዚህ ላይ እናተኩር!

ጉዳዩ  የሚመለከታቸው ችላ ብለው፣ ዝምታን መርጠው፣ በያሉበት በሌላ ክንውን ላይ ሲጠመዱ፤ ጉዳዩ የማያገባቸው፣ ዕውቀቱ የሚጎድላቸው፣ ተከታይ ጉዳቱ የነሱ ያልሆነባቸው፣ ባጠቃላይም ተጠያቂነት የሌላቸው ሰዎች መድረኩን ይጨብጡታል። ሂደቱንና ትርክቱን ወዳልሆነ አቅጣጫ ይመሩታል። የሚከተለው ምን እንደሚሆን ለመገመት፤ ሊቅነት አይጠይቅም። ዛሬ ይሄን በአገራችን ላይ ያንዣበበ አደጋ በውል ተገንዝበን፣ አገራዊ ውይይት አድርገን፣ ወደ መፍትሔው አብረን ካልተጓዝን፤ የተገጣጠመ መፀፀቻ ቦታና ጊዜ፤ ነገ አይኖረንም። ይህን ለማድረግ ደግሞ፤ ሁላችንን የሚያግባባ ራዕይ ሊኖረን ይገባል። ልሂቃንን ወይንም ባለሥልጣናትን ማዕከል ያደረገ መፍትሔ አይሠራም። አገራችን ካንዣበበባት አደጋ የምትድነው፤ ሕዝቡን ያማከለ ራዕይ ሲኖር ነው። የደርግን አረመኔ አገዛዝ፤ ኢትዮጵያዊያን በፍርሃት፣ በድንጋጤና ግራ በመጋባት፤ በተለያየ መንገድ እየተደነባበርን አለፍነው። የትግሬዎቹን ነፃ አውጪ ግንባር ደግሞ፤ በመደናገር፣ ባለመግባባትና በየጎጇችን በመታጎር አለፍነው። አሁን በሩ ተከፈተ፣ ብርሃን ገባ ብለን ስንነሣ፤ የተቀፈደድንበት ገመድ አልለቀን አለ። በአማራው ላይ እየደረሰ ያለው በደል እየባሰ መጥቷል። የተለመደ እኔን ምረጡኝ ውድድር፤ ይደለቅለታል። በሥልጣን ላይ ያለው ፓርቲ ሁሉንም አድራጊ ፈጣሪ ነው። ምርጫው ይካሄዳል፤ ግን ምንም ዓይነት ለውጥ መጠበቁ የዋህነት ነው። የአገራችን የፖለቲካ ሀቅ ይህ ነው።

በመጀመሪያ ከውጪ ሀገራትና ኃይላት የሚደረገው ጫናና ጫጫታ፤ ጊዜያዊ ነው። አብዛኛውን ጊዜ በመንግሥት ሥልጣን ላይ የተቀመጡ ሹሞች የተጠመዱት፤ የሥልጣን ኮርቻቸውን ለማደላደልና ለማርዘም ነው። በጣም ሠልጥነዋል ከተባሉት አገራት እስከ ኋላ ቀር የተባሉት ድረስ፤ ይሄ ሀቅ ነው። የዶናልድ ትራምፕን አጉራ ዘለል ተግባር እያየነው ነው። የሶስተኛ አገራት መሪዎች የተዘገበው ታሪካቸው ይሄው ነው። በርግጥ፤ ምክንያት ያለው የውጪ አገራት ተንኮል፤ በአገራችን የፖለቲካ ሂደት ጣልቃ ገብነቱ አይሏል። ይሄ አይካድም። የፖለቲካ ግብና ዓላማ አንግበው ነው የተነሱትና አታሞውን የሚደልቁት። ይህ ድርጊት በአገራችን ያለውን የገዢ ክፍል ሁለት ምርጫዎች ሠጥተውታል። አንደኛው ምርጫውን በማካሄድ ሕጋዊነትን አግኝቶ፤ ሁሉን እኔ አደርጋለሁ በማለት፤ አገዛዙን መቀጠል ነው። ሁለተኛው ደግሞ፤ ከላይ የተዘረዘሩትን አደጋዎች በውል አገናዝቦ፤ አገር በቀልና የውጪ ኃይላት የደቀኑብንን ጣልቃ ገብነት ለመገላገል፤ ኢትዮጵያዊያን ከመንግሥታቸው ጋር ሆነው እንዲቆሙ፤ “አንድ አገር! አንድ ሕዝብ! አንድ ሰንደቅ ዓለማ!” ብሎ መነሳት ነው።

የመጀመሪያው ምርጫ፤ ቀላሉና የተለመደው መንገድ ነው። ለውጪ ጣልቃ ገቦች፤ “ጠላቶቻችን!” እያሉ የራስን አታሞ መደለቅ ነው። ለማንኛውም ችግር፤ “መጡብህ!” እያሉ ማስፈራራት ነው። “ሁሉን ትተን ስላገራችን ብቻ እንቁም!” “መጀመሪያ አገር ስትኖር ነው!” “አሁን ዓይኖቻችንን ጨፍነን፤ መሪዎቻችንን እንደግፍ!” እያሉ መጮህ ነው። ይህ ለጊዜው ሲሠራ፤ አደጋው ለነገ የተዳፈነ ረመጥ ነው። ገዢውን ሹም፤ “እንዳሻህ አድርግ!” ብሎ ነፃ ሜዳ የሚለቅለት ነው። ትርፉ ለዘመናት የሚቆይ የቆላ ቁስል ነው።

ተጨማሪ ያንብቡ:  የምስጢራዊው ድምፃዊ ‹አዳዲስ› ምስጢሮች

ሁለተኛው ምርጫ፤ ግልጥ የሆነና ቅንነትን ብቻ የሚጠይቅ ኢትዮጵያዊ ተቆርቋሪነትን የያዘ ነው። የሚነሳው፤ “እኒህን ያፈጠጡ ችግሮች የምንቋቋማቸው፤ በአንድነት ስንነሳ ነው!” ብሎ ከማመን ነው። አንድነት፤ በሥልጣን ላይ ያለው መንግሥት ስላዘዘ የሚመጣ ክንውን አይደለም። ከሕዝቡ ልብ የሚመነጭ፤ አገር ወዳድነት ነው። አሜሪካም ሆነች ግብፅ፣ ሌሎች አገራትም ሆኑ አውሮፓ፤ የኢትዮጵያን ጥቅም እንጂ፤ የእከሌን ወይንም የእከሊትን ባለሥልጣናትን ጥቅም አይደለም ሊያጠቁ የተነሱት። ስለዚህ ይህን ጥቃት መቋቋም ያለባቸው፤ ባለሥልጣናት ብቻቸውን ሳይሆኑ፤ መላ ኢትዮጵያዊያን ነን። ይህ እንዲሆን ደግሞ፤ መላ ኢትዮጵያዊያንን ያቀፈ ራዕይና አመራር እንዲኖር የግድ ይላል። ሕዝብ ያለ አገር እንደማይኖር ሁሉ፤ አገርም ያለ ሕዝብ ትርጉም የለውም። ሕዝቡን በትክክል የማይመራ ገዢ ክፍል፤ ሕዝቡን አይወክልም። አሁን ባለው የኢትዮጵያ የፖለቲካ እውነታ፤ የችግሮቹ መጠንና ክፋት፤ ጥልቀት ያለው ተቆርቋሪነትና አገር ወዳድነትን ይጠይቃል። ከመንግሥት በኩል፤ ከራስ ሥልጣን በፊት አገርን ማስቀደምን ይሻል። ከሕዝብ በኩል፤ ሙሉ በሙሉ መንግሥቱን የኔ ብሎ ማቀፍን ይፈልጋል። እኒህ ሊገጣጠሙ የሚችሉት፤ አገር አቀፍ የሆነ ራዕይና መሪ ሲኖር ነው። ለውጪ ወራሪዎች መሳሪያ የሆኑትን የትግሬዎች ነፃ አውጪ ግንባር ርዝራዥና የኦነግ ሸኔን ኃይል ጨርሶ መልቀምና መደምሰስ አስፈላጊ ነው። በዘር የከፋፈለን አገዛዝ ማስወገድ ያሻል። ይህ ከችግሮቹ አንጻር ባንድ ቀን የሚተገበር አይደለም። ጊዜን ይጠይቃል፤ መሥረቱ ግን መጣል አለበት።

ይሄን ሁለተኛ ምርጫ ትቶ፤ በተለመደው መንገድ፤ የውጪ አገራትና ኃይላትን ጣልቃ ገብነት በማሳበብ የአገርን የፖለቲካ ቅኝት ለራስ ግብ መምራት አደጋ አለው። ምርጫው ይካሄዳል። በሥልጣን ላይ ያለው ፓርቲ ሕጋዊነት አገኘሁ ብሎ፤ ያለውን ይቀጥልበታል። አሁን በኢትዮጵያ ያለው የፖለቲካ እውነታ፤ አምባገነንን በሥልጣን ላይ ለማስቀመጥ ምቹ መሆኑን ማወቅ አለብን። አንዳንዶች እንደሚይስቡት አምባገነንነት በአንድ ቀን፣ በአንድ ቦታ ላይ ቡልቅ ብሎ የሚከሰት አገዛዝ አይደለም። ብዙ ታሪካዊ አጋጣሚዎች ባንድ ላይ ሰምረው መሰለፍ አለባቸው። የቀውስ፣ የአደጋና የትርምስ ዳመና ባገር ላይ ማንዣበብ አለበት። ዴሞክራሲን ለማስፈን የቆሙ ተቋማትና አገር ወዳድ ኢትዮጵያዊያን ወደ ጎን መገፋት አለባቸው። ተቋማቱ ነበሩ ብለን ካመን! አድርባዮችና አቁላቢዎች የሥልጣን ሰልፉን እንደ ጎርፍ መምራት አለባቸው። ግድ የሌሾች መድረኩን ማጣበብ አለባቸው። ይሄንን ለመጋለብ የተዘጋጀ ቁንጮውን መጨበጥ አለበት። የዚህ ሂደት እንግዲህ፤ ዝግጅትና ጊዜን የሚጠይቅ ነው። የእስካሁኑ የአገራችን የፖለቲካ ሂደት ለዚህ አዘጋጅቶናል ብዬ አምናለሁ።

ከውጪ አገራት በኩል፤ እንደልባቸው የሚያዙትና የነሱን ጥቅም የሚያስጠብቅላቸው መንግሥት ለማስቀመጥ፤ ምን ጊዜም አባርተውልን አያውቁም። ችግራችን ራሳችን የምንፈጥረው አምባገነን ነው። ኢትዮጵያን እንዳትሆን አድርጎ፣ አገራችን አገር ወዳድ ወጣት አልባ አስቀርቶ፣ ራሱ ጅራቱን ቆልፎ የሸመጠጠው አረመኔው መንግሥቱ ኃይለማርያም፤ ባንድ ቀን አምባገነን አልሆነም። በተንኮል ልቡ ተበርዞ፣ በመሰሪነት አእምሮው ደንዝዞ፣ በአማራ ጥላቻ ደሙ ተበርዞ፣ በክፍፍል መርዝ ኢትዮጵያዊያንን እርስ በርስ እንድንፋጅ አዘጋጅቶ፤ ተሸማቆ ወደ ሕልፈቱ የወረደው መለስ ዜናዊ፤ በአንድ ዕለት አምባገነን አልሆነም። የአገራችን የፖለቲካ ሂደት አሳሳቢ ደረጃ ላይ ነው። ከላይ የተዘረዘሩት የአምባገነን ለም መሬት መገኘቱ ገሃድ ነው። የአማራ ብልፅግና ፓርቲ፤ አማራውን የሚወክልና ለአማራው የቆመ ሳይሆን፤ ትናንት አማርኛ ተናጋሪ የትግሬዎች ነፃ እውጪ ግንባር እንደነበር ሁሉ፤ ዛሬም አማርኛ ተናጋሪ የጠቅላይ ሚኒስትሩ ቀኝ እጅ ሆኗል። ሌሎች በአገሪቱ ያሉ የተለያዩ የብልፅግና ፓርቲዎችም እንዲሁ ናቸው። ( ክፍል ፫ ይቀጥላል )

 

1 Comment

  1. በአማራ ክልል የብልጽግና ለብልፅግና አባላት ያልሆኑ ፡ በመጪውም ምርጫ ብልፅግናን የማይመርጡ ገበሬዎች ማዳበሪያና ምርጥ ዘር መከልከላቸው ተሰማ ::

    http://www.futuredirections.org.au
    Ethiopia Accused of Weaponising Food in Tigrayan Conflict

    https://www.futuredirections.org.au/publication/ethiopia-accused-of-weaponising-food-in-tigrayan-conflict/

    https://www.futuredirections.org.au/publication/kept-on-the-sidelines-the-aus-non-intervention-in-ethiopia/

ሀሃሳብ እና አስተያትዎን ይስጡ

Your email address will not be published.

This site uses Akismet to reduce spam. Learn how your comment data is processed.