ፋሲካ – ፊልጶስ

በጊዜ ሰንሰለት – በጊዜ ቀመር ወቅት
አልፈህ የምትመጣው ሁሌም ዓመት – በዓመት
የሙታን ትንሳኤ ታላቁ ዓውደ – ዓመት፤
‘’የኩዳዴ መፍቻ’’ እንዴት ነህ ፋሲካ ?…..
በአንተ ያፈረ አለ ወይ?… ወይስ የተመካ?…..
ለማን ዛሩ ወርዶ ሆነለት “ጆከር’’፣
ማንስ ተነጅሶ ዞረበት “አኪር”፤…..
እነማን አፍርሰው – እነማን ጰጰሱ
እነምን ተሽረው – እነማን ነገሱ፤
እነማን ተገለው – እነማን ተርፍዋል
እነማንስ ጠፈተው – እነማን ለምትዋል
እነማን ሄደው – እነማን መ’ተዋል፤…….
ለመጭው ዘመን፣ ሀዝብን ‘’ለመጋለብ’’
እነማን ታጭተውል በምርጫ ሰበብ፤
እነማንስ ከድተው – እነማን ታመኑ
ተጠየቅ ፋሲካ በዓውደ – ዓመት ዘመኑ?…..
ፎቅ – በፎቅ ገንብቶ
አዲስ ‘’ቪላ’’ ሰርቶ
ወይም መርጦ ገዝቶ፤….
በአዲስ ልብስ አጊጦ
አምሮ ተሽቆጥቁጦ፤…..
ሰንጋ ፍሪዳውን – በግ ዶሮውን አርዶ
ጮማ ሥጋ ቆረጦ – በጠጅ በውስኪ፣ በጠላ አወራርዶ፤…..
ስንቱ ሰው ፈሰክ በቀይ ባ’ድባሩ
ስንቱስ ጾም አደረ – ስንቱስ ተሳደደ በገዛ ሀገሩ።
ቤተሰቡን አ’ቶ – ቤት ንብረቱ ፈርሶ
በወገን ትዝታ ውስጥ ልቡ ታምሶ፤
በሰው ሀገር ምድር በስደት ‘’ካምፕ’’ ኑሮ
በሀዘን – መከራ – በእዬዬ – እሮሮ
ስንቱ ውሎ አደረ፣ የባአዳን እጅ ልሶ
በእለተ ዓውደ – ዓመትህ እምባውን አፍስሶ።
ከሙያ ጉሮሮው – ከስራው ተነስቶ
የጎጆ ቅልሱን የእጁን ተቀምቶ፤
‘’በፕላስቲክ’’ ጣራ በጎዳና ኑሮ
ስንት ወገን ፈሰከህ አ’ቶ ‘’መናኛ’’ ዶሮ።
እነማን ታስረው – በእነማን ተግዘው
ያለፍርድ ዘብጥያ – ከርቸሌ ወርደው፤
በዕለተ ፋሲካህ …..
በዕለተ ዓውደ – ዓመትህ፤…..
በሀሳብ – ትካዜ በትዘታ ዋሉ
በ’ውነት ትንሣኤ ነው – በዓል ነወይ እያሉ።
የነማን አባቶች – የነማን እናቶች
የነማን ወንድሞች – የነማን እህቶች
የነማን ልጆች – የነማን ወገኖች፤…..
በየስርቻው — በየጎዳናው
ተነቀው — ተዋርደው
ተረግጠው — ተጥለው፤
ሲለምኑ ዋሉ በዕለተ ዓውደ – ዓመትህ
ማንስ ሆነ መጽዋች ዛካሪ በስምህ።

ፋሲካ ያ’መት ነህ
ብታልፍ ትመጣልህ፤
ምን ‘’አኪር’’ ይዘህ ነው
ምን ‘’ካርት’’ ስበን ነው
ደ’ሞ የዛሬ ዓመት የምንገናኘው ????—-

——//——-

ፊልጶስ
e-mail: philiposmw@gmail.com

ሀሃሳብ እና አስተያትዎን ይስጡ

Your email address will not be published.

This site uses Akismet to reduce spam. Learn how your comment data is processed.