ከህወሓት ተኮርጆና ከሻዕብያ አምባገነናዊ የሆነ የአስተዳደር ዘይቤ ጋ ተዳቅሎ፤ እንዲሁም በማኬያቬሊያዊ ፍልስፍና ተቃኝቶ የቀረበው እጅግ አደገኛው የዶ/ር አብይ መንገድ!!!

6

ከፍትህ ይንገስ

በተደጋጋሚ እንደሚገለፀው የህወሓት ሰዎች ትግል ሲጀምሩ እንደ ዋነኛ አላማ አድርገው የተነሱት ቁጥር አንድ ጠላቶቻችን ናቸው ብለው የሚያስቧቸውን አማራንና ኦርቶዶክስን በማዳከም ታላቋን ትግራይን መመስረት ነበር። ይህንንም በማኒፌስቷቸው አስፍረው ረዘም ላለ ጊዜ ሲሰሩበት ቆይተዋል። ትግሉ እየገፋ ሲሄድ ግን ደርግ ስልጣን ላይ እስካለ ድረስ ታላቋን ትግራይን መስርተን በሰላም መኖር አንችልም የሚል እምነት ላይ ስለደረሱ በመጀመሪያው አላማቸው አልገፉበትም። እናም ከተቻለ ደርግን ጥለው ራሳቸው ፈላጭ ቆራጭ ሆነው የሚቀጥሉባትን ኢትዮጵያ መፍጠር ካልሆነ ደግሞ ከሌሎች ኢትዮጵያውያን ጋ ተባብረው ደርግን በማስወገድ መጀመሪያ ይዘውት የነበረውን ትግራይን አገር የማድረግ አላማ ማሳካትን በቅደም ተከተል አስቀምጠው ተንቀሳቅሰዋል። ያም ሆኖ ግን ይህ እቅድ በምስጢር ተይዞ የቆየው በከፍተኛ አመራሮቹ እንጅ ከመካከለኛ አመራሮች ጀምሮ እስከተራ አባላት ያሉት ታጋዮች የሚያውቁት ነገር እንዳልነበር ከትጥቅ ትግሉ ራሳቸውን ካገለሉ የቀድሞ ታጋዮች ጋ ከነበረኝ ውይይት ለመረዳት ችያለሁ።
ይህ በእንዲህ እንዳለ ነው የህወሓት ሰዎች በዋግ እንዲሁም በበለሳ አከባቢ ይንቀሳቀስ ከነበረው የኢትዮጵያ ህዝቦች ዴሞክራሲያዊ ንቅናቄ (ኢህዴን) ጋ ተነጋግረው ህወሓቶች ወደ መላው ኢትዮጵያ ለመጓጓዝ የሚያስችላቸውን ኢህአዴግ የሚባል ግንባር በይፋ ያቋቋሙት። ከዚህ በኋላ የህወሓት ሰዎች ወደ አማራ ክልል ሊያጓጉዛቸው የሚችልን ኢህአዴን የተባለ ፈረስ በእጃቸው አስገቡ። ኢህአዴን በተባለው ፈረስ ተጓጉዘውም “ዘመቻ ዋለልኝና ዘመቻ ቴወድሮስ” በሚባሉ ስያሜዎች ብዙዎቹን የወሎና የጎንደር አከባቢዎች ከደርግ አስለቅቀው በቁጥጥራቸው ውስጥ አስገቧቸው።
በዚህ ወቅት አብዛኛዎቹ የህወሃት ተዋጊ ሃይሎች ትግራይን ነፃ ስላወጣን ከዚህ በኋላ በትግሉ ውስጥ አንቀጥልም በሚል እየተበተኑ ወደየቀያቸው መመለስ መጀመራቸው ይታወቃል። ይህ ያልታሰበ ዱብዳ የገጠማቸው የህወሓት ከፍተኛ አመራሮች በሁሉም የትግራይ አከባቢዎች ህዝባዊ ኮንፈረንስ በመጥራት ትግራይን ብቻ ከደርግ ነፃ አውጥተን ትግሉን እናቁም ብንል ደርግ ነጋ ጠባ እየተተናኮሰ ሰላም ሊያሳጣን ስለሚችል ሙሉ በሙሉ ማስወገድ አለብን የሚል ሰፊ ቅስቀሳ እንዳደረጉ በትግሉ የተሳተፉ ሰዎች በተለያዩ ጊዚያት የሚያወሩት ሃቅ ነው። ተሳክቶላቸውም ትግሉ ደርግን እስከመጣል ድረስ እንዲቀጥል ተስማምተው ወላጆች ልጆቻቸው ወደ ትጥቅ ትግሉ እንዲመለሱ ማድረጋቸው ይነገራል።
የህወሃት አመራሮች ከላይ በተገለፀው መልኩ የተለያዩ ቅስቀሳዎችን ተጠቅመው ተዋጊዎቹ ወደ ትጥቅ ትግሉ እንዲመለሱ ካደረጉ በኋላ እንደ አዲስ በማደራጀት ጦርነቱን አስቀጥለው ጎጃምንና ሰሜን ሸዋን ሙሉ በሙሉ እንደሚቆጣጠሩ ሲረዱ ወደ ኦሮሚያ ለመግባት ሌላ የሚያጓጉዛቸው ዘዴ በመፈለጋቸው ምክንያት ኢህዴን ጋ ሆነው ይታገሉ በነበሩ የኦሮሞ ተወላጆች አማካኝነት የኦሮሞ ህዝብ ዴሞክራሲያዊ ድርጅት (ኦህዴድ) የሚባል ፈረስ መፍጠራቸው ይታወቃል። ትንሽ ቆይተውም በኦህዴድ ሰዎች እየተመሩ ጦርነቱን “ዘመቻ ቢሊሱማ ውልቂጡማ” የሚል ስያሜ ሰጥተው መላውን ኦሮሚያ በቁጥጥራቸው ስር አስገቡ። ከዚህ በኋላ የቀረው ደቡብ ስለነበር ወደዚያ ሰተት ብሎ ለመግባት አሁንም ኢህዴን ውስጥ የነበሩ የደቡብ ተወላጅ ታጋዮችን አሰባስበው የደቡብ ኢትዮጵያ ህዝቦች ዴሞክራሲያዊ ንቅናቄ (ደኢህዴን) የሚባል ፈረስ ፈጠሩ። አንድ ወቅት ላይ ደግሞ ወደ ደርግ ሰራዊት ሰርገው ለመግባት የሚያስችላቸው መጓጓዣ ፈልገው ስለነበር የኢትዮጵያ ዴሞክራሲያዊ መኮንኖች ንቅናቄ (ኢዴመአን) የሚባል ቡድን አቋቁመው እንደነበር አይዘነጋም። ይሁን እንጅ ይህ ቡድን ደርግ ከወደቀ በኋላ ብዙም እድሜ የነበረው አልመሰለኝም።
ህወሓቶች በዚህ መንገድ አዲስ አበባን ጨምሮ ዋና ዋና የሚባሉ የኢትዮጵያን ክፍሎች ከተቆጣጠሩ በኋላ ከራሳቸው አመራሮች ውስጥ ምስለኔዎችን መልምለው በሁሉም ክልሎች ያሉ ፈረሶቻቸውን እንዲመሩ ላኳቸው። ወደተለያዩ ክልሎች ከተላኩት ውስጥም ሰሎሞን ፂሞ በኦሮሚያ እና ቢተው በላይ ደግሞ በደቡብ ውስጥ ተጠቃሾች ናቸው። ታዳጊ የሚባሉት አራቱ ክልሎችም ቢሆኑ እንዲሁ ምስለኔዎች ተመድበውላቸው የሚተዳደሩት በነዚሁ ምስለኔዎች እንደነበር የሚታወቅ ነው። ፡ አማራ ክልልም በክልል ደረጃ ባይሆንም ክፍላተ ሃገራትና ዞኖች ላይ በልምድ ማካፈል ስም ምስለኔዎች ተመድበው ለአማራ ህዝብ መብት ይታገሉ የነበሩ ግንባር ቀደም ሃይሎችን ቢሮክራት እያሉ ሲያሳድዷቸው እንደነበር የቅርብ ጊዜ ትዝታ ነው።
ህወሃቶች በዚህ መልክ በፌዴራሊዝም ስም የከፋፍለህ ግዛ መርህን በመከተል ለሃያ ሰባት አመታት ሁሉም በእጃቸው ሁሉም በደጃቸው እንዲሆን ማድረጋቸው ያንገሸገሸው ህዝብ ባካሄደው መራር ተጋድሎ ከትከሻው ላይ አሽቀንጥሮ ጥሏቸዋል። ይሁንና የህወሓት ሰዎች በህዝብ ትግል ይንኮታኮቱ እንጅ አስተሳሰባቸው ግን አሁንም በሃገር ደረጃ ተንሰራፍቶ እንደሚገኝ ምንም ጥርጥር የለውም። እንዲያውም አስተሳሰቡ በደንብ ተከሽኖና ከሻብዕያ ፍፁም አምባገነናዊ የአስተዳደር ስርዓት ጋ ተዳቅሎ እንዲሁም በማኪያቬሊያዊ (Machiavellian) ፍልስፍና ተለውሶ በዶክተር አብይ መሪነት እየቀጠለ እንደሆነ ለመረዳት የግድ የተለየ ስጦታ ያለው ሰው ሆኖ መፈጠርን አይጠይቅም። ሁላችንም እንደምናውቀው የህወሓት ሰዎች የአስተሳሰብ ስሪት የተመሰረተው በአማራና ኦርቶዶክስ ጠልነት ላይ ነበር። የኦሮሞ ብልፅግናዎችም ቢሆኑ ተመሳሳይ አስተሳሰብ እንዳላቸው በሚያሳይ መልኩ አማራ ህዝብ ላይ እንዲለጠፉ የተደረጉ “ነፍጠኛና ትምክህተኛ” የሚባሉ ቃላቶችን በመጠቀም ስለጉዳዩ ምንም የማያውቀውን ሰፊውን የአማራ ህዝብ ለማሸማቀቅና አንገት ለማስደፋት ሲሞክሩ እየሰማንና እያየን ነው።
አማራ ቅኝ ገዝቶናል ብለው ስለሚያስቡም በተራችን እኛ መግዛት አለብን የሚል አስተሳሰብ አንግበው እየተንቀሳቀሱ እንደሆነም በተደጋጋሚ ታዝበናል። እንዲያውም ለሶስት ሽህ አመታት ስለተገዛን እኛም ለሚቀጥሉት ሶስት ሽህ አመታት መግዛት ይኖርብናል እያሉ በየመድረኩ የሚደሰኩሩ በጠቅላይ ሚ/ር አማካሪነት ደረጃ ሳይቀር የተቀመጡ ሃይሎች እንዳሉ ሊካድ የሚችል ሃቅ አይደለም። እነታየ ደንደአም ቢሆኑ የዶ/ር አብይን አስተዳደር ከፍ ከፍ እያደረጉ የዛጉየ ስርወ-መንግስትን እንዲሁም እነአክሊሉ ሃብተወልድን እጅግ አድርገው የሚያጣጥሉት ከዚሁ እኛ ሶስት ሽህ አመት መግዛት አለብን ከሚለው ቅዠታቸው ተነስተው እንደሆነ ግልፅ ነው።
ይህን በተመለከተ የኦሮሞ ብልፅግናዎችን ጨምሮ እነአቶ ለማ፣ እነጃዋር፣ ኦነግ፣ ኦፌኮ፣ ሌሎች የኦሮሞ ፖለቲካ ፓርቲዎች፣ የማህበረሰብ አንቂዎችና መሰል ልሂቃን ልዩነት ያላቸው አይመስለኝም። ልዩነት አላቸው ከተባለ ማን ስልጣን ይያዝና ያልተገደቡ ፍላጎቶቻቸው በምን ፍጥነት ይፈፀሙ በሚሉት ጉዳዮች ላይ ብቻ ይመስለኛል። በዚህ ረገድ እነአቶ ለማ የኦሮሞ ህዝብ ቆጥሮ የሰጠንን ጥያቄዎች በአስቸኳይና አሁኑኑ በአዋጅ መመለስ አለብን የሚል የፀና አቋም እንዳላቸው ስልጣን ላይ እያሉ ሲያወጧቸው ከነበሩ መግለጫዎቻቸው መገንዘብ ይቻላል። ይህንን አቋማቸውን ለመረዳት የዴሞግራፊውን ጉዳይና “የአዲስ አበባን የባለቤትነት ጥያቄ እየሰራንበት ነው” የሚለውን መግለጫቸውን ማስታወስ ብቻ በቂ ነው።
ዶ/ር አብይ ግን የነአቶ ለማን መንገድ ቢመርጥ አደጋ እንዳለው በመረዳቱ ከነሱ ጋ የተስማማ አይመስልም። ምክንያቱም ዶ/ር አብይ በነአቶ ለማ መንገድ ቢጓዝ “ሆ” ብሎ እየደገፈው ያለውን የአንድነት ሃይል ነኝ የሚል የህብረተሰብ ክፍል ሙሉ በሙሉ ሊያጣው እንደሚችል በደንብ ሳይረዳ አልቀረም። እንኳን የነአቶ ለማን መንገድ በግልፅ መርጦ ይቅርና በድብቅ እየፈፀመ ባለው የሴራ ፖለቲካ ምክንያት እንኳ አያሌ ደጋፊዎችን እንዳጣ በሚገባ ተረድቷል። ስለዚህ የዶ/ር አብይ መንገድ ለዘብ ያለ፣ በጣፋጭ አማርኛ የተለወሰ፣ ሰው መስማት የሚፈልገውን እንጅ ሳት ብሎት ካልሆነ በስተቀር እሱ እንዲሆን የሚመኘውን የማይገልፅ፣ ንግግሩና ተግባሩ አብዛኛውን ጊዜ የሚጣረስና የአሜሪካ የቀድሞ ፕሬዚደንት ከነበረው Harry S. Truman የቀዳውን “Convince or Confuse” ዘዴ ተጠቅሞ ከቻለ ሌሎችን በማሳመን፣ ካልሆነ በማደናገር፣ ይህ ካልተቻለ ደግሞ በማስፈራራትና ሃይል በመጠቀም የራሱን ቡድን የበላይነት በሌሎች ላይ መጫን እንደሆነ ግልፅ እየሆነ መጥቷል። ይህን ለማወቅ “በአዲስ አበባ ጉዳይ ላይ ጦርነት እንከፍታለን”፣ የአዲስ አበባን ህዝብ ከመጤፍ ባለመቁጠር “መርንግስታችን ተነካ ብሎ “የሰበታና የሱሉልታ ህዝብ ግልብጥ ብሎ ወደ ቤተመንግስት ሊመጣ ነበር” የሚሉና ሌሎች መሰል ንግግሮችን በደንብ ማጤን ጠቃሚ ነው።
ከላይ በተገለፀው የአካሄድ ልዩነት ምክንያት እነአቶ ለማ በያዙት የተቻኮለ አቋም የረጅም ጊዜ ድብቅና በሴራ የተሞላ ግብ ሊያደናቅፉ ነው የሚል ስጋት በመፈጠሩ ምክንያት እስከመቸ እንደሆነ ባይታወቅም ከፖለቲካ ገለል እንዲሉ መደረጋቸውን ታዝበናል። ምክንያቱም ዶ/ር አብይ በሚከተለው ማኪያቬሊያዊ አስተሳሰብ ስሌት መሰረት ውጤቱ የተሳካ እንዲሆን በሂደቱ የቱንም ያህል አሰቃቂ ቢሆንም ማንኛውንም አይነት እርምጃ መውሰድ ተቀባይነት ያለው አሰራር ነውና።
ከነአቶ ለማ ፖለቲካዊ መገለል በኋላ እነዶ/ር አብይ የኦሮሞ ህዝብ ቆጥሮ ሰጠን ያሏቸውን ጥያቄዎች ለመመለስ ያስችለናል ያሉት ብልፅግና ፓርቲን ነው። ምክንያቱም ልክ ህወሓት ኢህአዴግን ፈረስ አድርጎ እንደተጠቀመበት ሁሉ ዶ/ር አብይም “ብልፅግና ፓርቲ”ን እንደፈረስ እየተጠቀመበት እንደሆነ በአቶ ሽመልስ በኩል በድብቅ ባስተጋባው መልዕክቱ እንድናውቀው አድርጎናል ብየ አምናለሁ። እዚህ ላይ ብልፅግና ፓርቲ የተፈጠረው በዶ/ር አብይ መሆኑን በሚገባ መረዳት ተገቢ ነው የሚል እምነት አለኝ። ሰው አንድን ነገር ሲፈጥር ደግሞ የሚያወጣው ስሙን ብቻ ሳይሆን ይዘቱንም ጭምር ነው። ስለዚህ አቶ ሽመልስ የተናገረው ሁሉ በዶ/ር አብይ የተጠነሰሰ እንደሆነ ለመረዳት የሚከብድ ነገር ያለው አይመስለኝም። በሌላ አነጋገር አቶ ሽመልስ የዶ/ር አብይ አፍ እንጅ የሃሳቡ አመንጭ አይደለም ማለት ነው።
ለማንኛውም በአቶ ሽመልስ ሲገለፅ የሰማነው ብልፅግና ፓርቲ የተፈጠረው በዋነኛነት የኦሮሞን ጥቅም ለማስከበር እንደሆነ ነው። ይህን ለማድረግ ደግሞ ቅኝ ገዝቶናል የሚሉትን አማራን ማዳከም እንዳለባቸው አቶ ሽመልስ ካደረገው ንግግር መረዳት ይቻላል። አማራን ለማዳከም እየተጠቀሙባቸው ካሉት ስልቶች ውስጥ አንደኛው ትግርኛ፣ ሶማልኛና አፋርኛ የፌዴራል መንግስቱ የስራ ቋንቋዎች እንዲሆኑ ማድረግን ነው። ይህን ያደረጉት አማርኛ ቋንቋን በማዳከም አፋን ኦሮሞ ጎልቶ እንዲወጣ ለማድረግ እንጅ ለተጠቀሱት ብሄሮች መብት መከበር ብለው እንዳልሆነ አቶ ሽመልስ ባደረገው ንግግር በግልፅ ጎልቶ ተቀምጧል።
በሌላ በኩል የተለያዩ የኢትዮጵያ ዋና ከተማዎች እንዲፈጠሩ በማድረግ ሃገራዊና አለማቀፋዊ ትኩረት ሳቢነቷን በመቀነስ አማራ ተቆጣጥሯታል የሚሏትን አዲስ አበባን የመዋጥ ሌላ እቅድ እንዳለም ዶ/ር አብይ በአቶ ሽመልስ አብዲሳ በኩል አስነግሯል። በዶ/ር አብይ እምነት ኢትዮጵያ የተለያዩ ዋና ከተማዎች የሚኖሯት ከሆነ የሃገር ውስጡም ሆነ የአለም አቀፍ ማህብበረሰብ በአዲስ አበባ ላይ ያለው ትኩረት ስለሚቀንስ ያኔ ዴሞግራፊውን በመቀየር ህዝበ ውሳኔ አካሄዶ ከተማዋን ለመጠቅለል ያለመ መንገድ እንደሆነ ለመገመት አይከብድም። ዴሞግራፊውን መቀየር ባይችሉ እንኳ ብልፅግና ፓርቲ ውስጥ እንዲኖራቸው በሚሰሩበት ድምፅን በድምፅ የመሻር መብት (Veto Power) ተጠቅመው አዲስ አበባን የሴራቸው ሰለባ ሊያደርጓት እንደሚሞክሩ ለመገመት ከባድ አይደለም። እዚህ ላይ ዶ/ር አብይ ስለአዲስ አበባ ሲጠየቅ የሚመልሰው ልክ እንደ ባህርዳር፣ መቀሌ፣ ሃዋሳ ሁሉ የኢትዮጵያውያን ነች የሚል እንጅ በተለየ መንገድ የኢትዮጵያውያንና የነዋሪዎቿ መሆኗን ገልፆ የማያውቅ መሆኑንም ማስታወስም ምን ያህል በሴራ የተሞላ ስራ እየፈፀመ እንደሆነ ለመረዳትም ጠቃሚ ይሆናል።
ሌላው ትኩረት ልንሰጠው የሚገባው መሰረታዊ ነገር ደግሞ ዶ/ር አብይ በፈጠረው የብልፅግና ዘመን ኦሮሞ ወይም ኦሮሞ ያልፈቀደለት ማንም ሌላ ሃይል ሃገር ሊመራ እንደማይችል እንዲሁ አቶ ሽመልስ ባደረገው ንግግር የተካተተውን ፍፁም ፀረ-ዴሞክራሲያዊና አምባገነናዊ የሆነ ምኞት ነው። ለዚህ እንዲያመች ደግሞ የኦሮሞ ብልፅግና ፈረሶች በአብዛኛዎቹ ክልሎች እንዲቀመጡ ተደርገዋል። ሁኔታዎችን ልብ ብሎ ለታዘበ ሰው ይህን እውነታ ለመረዳት ይከብደዋል ብየ አላስብም። ምክንያቱም የብዙዎቹ ክልሎች ፕሬዚደንቶች በዶ/ር አብይ ይሁንታ የተመደቡ ናቸው። በዚያ ላይ በተለይ ታዳጊ ክልሎችን የሚያስተዳድሩት አመራሮች ከሚመሩት የህዝብ ቁጥር ማነስና ባለባቸው የአስተዳደር ልምድ እጥረት ምክንያት የሃገሪቱን ከፍተኛ ስልጣን ይዟል ብለው ከሚያስቡት ቡድን ጋ እንደሚለጠፉ ከህወሓት ጋ የነበራቸውን የቀረበ ግንኙነት አይቶ መገመት አይከብድም። ስለዚህ ዶ/ር አብይ የኦሮሚያ ብልፅግናን ሰዎችና በየክልሉ ያሉ ፈረሶቹን ድምፅ ተጠቅሞ የሚፈልገውን ለማስፈፀም ጥረት ማድረጉ የሚቀር አይሆንም። ምናልባት እንኳ የታዳጊ ክልሎቹ አመራሮች የሴራ ፖለቲካውን ተረድተው ለህሊናቸው መቆም ቢጀምሩ ዶ/ር አብይ ከአቶ ኤሳያስ የቀሰመውን አምባገነናዊ ባህሪና ማኬያቬሊአዊ አስግተሳሰቡ ምክንያት ፍላጎቱን በሃይል ሊጭንባቸው አይሞክርም ብሎ ማሰብ የዋህነት ይሆናል።
ለማጠቃለል ያህል ዶ/ር አብይና እሱ የሚመራቸው የኦሮሞ ብልፅግና ሰዎች ይህን ሁሉ የሴራ ና የሽንገላ ፖለቲካ የሚያራምዱት ልክ የህወሓት ሰዎች ያደርጉት እንደነበረው ሁሉ አይሳካላቸውም እንጅ ከሆነላቸው አማራውን አዳክመውና አንገት አስደፍተው (ወይም በነሱ ቋንቋ ሰብረው) የራሳቸውን ቡድን የበላይነት ለመጫን ፍላጎት ያላቸው መሆኑን ለመገንዘብ ከባድ አይደለም። አንዳንዴም አቶ ሽመልስ በድብቅ ካደረገው ንግግር ሾልከው ከወጡት ውጭ ያሉ በአማራው ላይ የመቆመር እቅዶች እየተቦኩና የማጥቂያ ሰበቦች እየተሸረቡ እንደሆነ የሚያሳዩ ፍንጮችን እንደ ታየ ደንደአ ባሉ የኦሮሞ ብልፅግና ሰዎች በኩል ብቅ ብቅ ሲሉ እየተመለከትን ነው። በተለይ ዶ/ር አብይ ኢትዮጵያ ውስጥ ከጦርነት በኋላ መከፋፈል የተለመደ ነው ማለቱ፤ እንዲሁም በደቡብ ሱዳኑ ሳልቫ ኪርና በተቀናቃኙ ሪክ ማቻር፤ በኬኒያው ኡሁሩ ኬኒያታና በተፎካካሪው ራይላ ኦዲናጋ መካከል ስለሚስተዋሉት ልዩነቶች ሲጠቅስ ምን እያሰበ እንዳለ ለመረዳት የሚከብደው ካለ መፈተሽ ያለበት ራሱን ነው። ሰሞኑን ኦሮሚያ ክልል ውስጥ ተደርጎ በነበረው ሰልፍ ላይ ሰላማዊ በሆነ መንገድ እየተንቀሳቀሰ እንዲያውም አንዳንድ የመንግስት አቋሞችን በመደገፍ የሚታወቀው አብን ጦርነትን መርጠው ከሚፋለሙት ኦነግ ሸኔና ህወሓት ጋ ተጃምሎ እንደጠላት ሲቆጠር ዶ/ር አብይም ቡራኬ መስጠቱ የዘፈን ዳር ዳሩ እስክስታ ነው እንዲሉ አማራ ላይ እየተሸረበ ስላለው ድብቅ ሴራ አስረጅ ሊሆን የሚችል ድርጊት ነው።
በእኔ እይታ ግን ዶ/ር አብይና እሱ የሚመራቸው የኦሮሞ ብልፅግና ሰዎች ይህን ሁሉ ያረጀ ያፈጀ ምናልባትም በህወሓት ሰዎች ተሞክሮ ያከሸፈ ሴራና ሸር ከማጠንጠን ይልቅ ሁሉንም የኢትዮጵያ ህዝቦች እኩል ሊያደርግ የሚችል ፍትሃዊ፣ ግልፅ፣ ተቋማዊና ዴሞክራሲያዊ የሆነ ስርዓት ለመገንባት ይቻል ዘንድ የበኩላቸውን ጥረት ቢያደርጉ አማራጭ የሌለው መንገድ ነው የሚል ሃሳብ አለኝ። ቀላሉ መንገድም ይሄው ነው።
በሌላ በኩል በዶ/ር አብይ ለጆሮ የሚጥሙና አማላይ የሆኑ ሽንገላዎች/ማታለያዎች እምነት አድሮባቸው ወይም ተደናግረው ካልሆነም በጥቅም ምክንያት እሱን ከኢትዮጵያዊም በላይ ኢትዮጵያዊ በማድረግ unconditional የሆነ ድጋፍ የሚሰጡት በተለይ የአንድነት ሃይል ነን የሚሉ የህብረተሰብ ክፍሎች ቆም ብለው ሊያስቡ ግዴታ የሚሆንባቸው ጊዜ አሁን እንደሆነ ላሰምርበት እፈልጋለሁ። ይህም ማለት ዶ/ር አብይ ጥሩ ሲሰራ መደገፋቸው አንድ ነገር ሆኖ ሃገር መቀመቅ ውስጥ የሚያስገባ ስራ ሲሰራ ጭምር ሽምጥ እየጋለቡ ግፋበት ከማለት ወጥተው ወደ ትክክለኛው ህዝባዊና ሃገራዊ መንገድ እንዲገባ ግፊት ቢያደርጉበት ይሻላል ባይ ነኝ። ካለበለዚያ አሁን የያዙት መንገድ “ቁጭ ብለው የሰቀሉትን ቆመው ማውረድ” የማይችሉበት ደረጃ ሊያደርሳቸው እንደሚችል ቢገነዘቡ መልካም ነው እላለሁ። ያኔ መፀፀትም ሆነ ፀጉር መንጨት እንወዳታለን ለሚሏት አገርም ሆነ ለህዝቦቿ የሚፈይደው አንዳችም ነገር አይኖርም።
ለማንኛውም ላሁኑ በዚህ ላብቃና በቀጣይ ደግሞ ዶ/ር አብይና እሱ የሚመራቸው የኦሮሞ ብልፅግና ሰዎች አሁንም ሌላውን የኢትዮጵያ ህዝብ በይተለይም ደግሞ ያው የፈረደበትን አማራ አንገት አስደፍተው የራሳቸውን የበላይነት ለመጫን ያላቸውን ቀቢፀ ተስፋ እውን ለማድረግ ምን ምን አይነት የማጥቂያ ምክንያቶችን/ሰበቦችን እያማተሩ እንደሆነ የሚያሳዩ ምልከታዎቸን ለማጋራት እሞክራለሁ። እስከዚያው መልካም ጊዜ።

6 Comments

  1. በፓርቲ ተደራጅ፤ ያንተን ሃሳብ የሚያራምድልህ ደግሞ “ባልደራስ” ብቻ ነው፤፤ አብን እንኳ ያንተ አይነት ጥላቻ በዶ/ር አቢይ ላይ የለውም፤ ያለበለዚያ “የቁራ ጩኅት” ነው የሚሆንብህ፤፤

    • Kedir Setete

      What does loving Abiy or hating Abiy got to do with it?

      You always say “Love Abiy , Hate Abiy” as a basis of your political argument to prove some political point over people who do not support Prime Minister Abiy , which brings us all back to the famous saying that clearly applies to you ‘LOVE IS BLIND’.

      You are blindly supporting Abiy because you are so much in love with PM Abiy Ahmed. You might be a victim of a voodoo love spell .

      • Same is true for hate – ‘HATE IS BLIND”. why do you hate him so much yourself?
        He might make mistakes here and there – In that case, critisim is in order! However, I do not doubt his good intentions for Ethiopia and Ethiopians for a fraction of a second. Labeling Abiy as “enemy of Amhara/Ethiopia” is a consciously criminal act. He cannot be against his own children, to say the least.

  2. ከድር ሰተቴ

    I did not say “I hate Abiy”. Nowhere.
    It is just that as I told you above, you Kedir Setete always relay your message with
    using the words ‘Hate Abiy , Love Abiy’. Very funny!
    If I was you I would seek a professional help , your compulsion to using the words ‘Hate Abiy , Love Abiy’ might be some serious disorder.

    • You don’t have to say/write it. የተከላከልከው ፍትህ ይንገስ የተባሉት ጸሃፊ የጻፉት መሆኑን ነው የሚገባኝ፤፤ ምንም በል ምን ወደን ፈቅደን መሪያችንን እንደግፋለን፤ ሲሳሳት እናርመዋለን፤፤ መብታችንን አክብር! አንተም አለመደገፍም መጥላትም መብትህ መሆኑን እንገነዘባለን፤ ወደጉልበት ብቻ አትሂድ፤፤ የማረጋግጥልህ ነገር ግን ‘ከድር ሰተቴ” የሚለው የሚገባህ ከ7 አመት በኋላ ነው፤፤ “ኢትዮጵያን ማስተዳደር እንዲህ ዋዛ !።” አሉ ዐጼ ሃይለ ሥላሴ
      The bottom line is I do not doubt Abiy’s good intentions for Ethiopia and Ethiopians for a fraction of a second. do you?

  3. ‘መደገፍ ሌላ መውደድ/ማፍቀር ሌላ’ ወይም ‘አለመደገፍ ሌላ መጥላት ሌላ’።

    በእንግሊዘኛ ጽፌ ከበላይ rational question ጠይቄህ rational መልስ አልሰጠኸኝም። እንደ ጠየቅኩህ አሁን ደግሜ በአማርኛ ፅፌ ልጠይቅህ፤ ‘አብይ አህመድን ማፍቀር/መውደድ ወይም አብይ አህመድን መጥላት ምን አመጣው/ምን አገናኘው?’

    አብይን “የአማራ/የኢትዮጵያ ጠላት” ያለን ከበላይ በፅሁፍህ ስትወነጅለው እንዳነበብኩት ፡ አብይን “የአማራ/የኢትዮጵያ ጠላት” ያለን (ይመስለኛል በአዲሱ ህግ አግባብ የጥላቻ ፅሁፍ hate speech በሚል) በወንጀለኛነት አስፈርጃለሁ ብለህ ፍትህ ይንገስ የተባሉትን ፀሀፊ አስፈራርተህ በእንጭጭ ለመቅጨት ከመፃፍ እንዲታቀቡ ስታሸብር እንዳልነበረ ፡ አሁን ደግሞ እንኳን የአንተን የኪቦርድ ድንፋታ ሊፈራ ቀርቶ የአንተን ድንፋታ ከቁምነገር እንደማይወሰድ ስታውቀው ጊዜ “..ወደ ጉልበት ብቻ አትሂድ ….ሰባትአመት በሁዋላ..” አልክ ። የአንተ አይነት የታወረ ፍቅር / የወላዋይ ፍቅር / የአሸባሪ ፍቅር ቢቀርበት አብይንም ሆነ ወይም ሌላውን ህብረተሰብ ይጠቅማል እንጂ አይጎዳም። ለእዚህም ነው በድጋሚ ይህንን የታወረ የአብይ ፍቅር አባዜህን ታከመው ብዬ የምመክርህ።

    እውነቱን ለመናገር የአንተ የከድር ለቀጣይ ሰባት አመታት ለአብይ ፍቅር የመስጠት አላማ ፤ ቢቀርበት ይሻለዋል ለአብይ ፤ ለፖለቲካውም ሆነ ለግል ህይወቱ ።

    “አላዋቂ ሳሚ ንፍጥ ይለቀልቃል ፣ ጠረን ይለውጣል
    አድብቶ በሚያጠቃ ውሻ ያስነክሳል።” አሉ ፕሬዚዳንት ሳህለወርቅ ዘውዴ

ሀሃሳብ እና አስተያትዎን ይስጡ

Your email address will not be published.

This site uses Akismet to reduce spam. Learn how your comment data is processed.